Giperaktiv bolalar bilan mashgʻulotlarni tashkil qilishda psixolog maxsus ishlab chiqilgan korreksion-rivojlantiruvchi dasturni qoʻllashi mumkin. Giperaktiv bolalarga yordam berishda ularning ota-onalari va oʻqituvchilari bilan ish olib borish hal qiluvchi ahamiyatga ega.
Kattalarga bolaning muammolarini tushuntirish zarur, uning qiliqlari ataylab qilinmasligini anglatish, ularning yordam va qoʻllab-quvvatlashisiz bunday bola oʻzidagi bor qiyinchiliklarni yengib oʻta olmasligini koʻrsata olish kerak.
Psixolog giperaktiv bolalarning ota-onalariga tarbiyaviy taʼsir etishning aniq usullariga amal qilishlarini tushuntirishi kerak. Ular shuni esda tutishlari lozimki, bolani holatining yaxshilanishi “unga boʻlgan muloyim, xotirjam va izchil munosabatga bogʻliqdir”.
Bunday bolalarni tarbiyalashda ota-ona ikkita keskinlikka yoʻl qoʻymasliklari kerak: haddan ziyod rahm - shafqat koʻrsatish va bir tomonidan esa uning oldiga u bajara olmaydigan ortiqcha aniqlik, shafqatsizlik va jazolar bilan uygʻunlashgan katta talablarni qoʻymaslik.
Psixolog olimlardan M. Rotterning koʻrsatishicha, bunday bolalar maktabga chiqqach jiddiy qiyinchiliklarga duch keladilar. Chunki oʻqish faoliyati diqqat funksiyasi rivojlanishiga yuqori talablarni qoʻyadi. Shuning uchun ham DEGS bolalar maktab talablarini bajara olmaydilar.
Qoida boʻyicha oʻsmirlik yoshida bunday bolalarda diqqatning nuqsonlari saqlanib qoladi, lekin giperaktivlik yoʻqoladi va koʻpincha faollikning susayishi, psixik faoliyatning inertligi va istakning yetishmasligi bilan almashadi.
Maktab taʼlimidagi muammolardan yana biri va past oʻzlashtirishga sabab boʻluvchi omil bu chapaqaylikdir. Chapaqaylik tarbiyachilar, ota-onalar va bolaning oʻzi uchun ham katta muammo hisoblanadi. Barchaga yaxshi maʼlumki, chap qoʻlning oʻng qoʻldan ustunligi tugʻma xususiyatga egadir. Yaqin vaqtgacha chapaqay bolalarning psixik xususiyati taraqqiyoti ular miyasining rivojlanashidan alohida holatda koʻrilgan. Biroq, miya va psixika aʼzo va uning funksiyasi sifatida oʻzaro bogʻlangandir. Chapaqaylik – bolaning zaruriy individual xususiyati boʻlib, uni taʼlim jarayonida hisobga olish shart.
Oʻquv taʼlim jarayonini aʼnanaviy ravishda verbal va mantiqiy tafakkur taraqqiyotiga, chap miya yarim sharlari rivojlanishiga asoslanadi. Bunday holat esa chapaqay bolalarning taʼlim jarayoniga muvaffaqiyatli moslashuvini qiyinlashtiradi.
Chap yoki oʻng qoʻlning ustunlik qilishi bolaning istagi yoki erkaligi emas, balki miyaning oʻng va chap yarim sharlari oʻrtasida vazifalarning oʻziga hos taqsimlanishidir. Nima uchun chap qoʻl ustunligi kelib chiqadi? Nimaning oqibatida chapaqaylik paydo boʻladi?. Biz odatda miya haqida bir butun aʼzo kabi fikr yuritamiz, lekin uning birligi ikkala miya yarim sharlarining faoliyatidan tashkil topadi. Ularning oʻrtasida qatʼiy farq boʻlib, miyaning funksional munosabatlarida ikkala yarim sharlarning ulushi bir xil emas. Bundan tashqari ulardan biri ustunlik qiladi.
Namoyon boʻlish xarakteriga koʻra funksional assimetriyaning uchta turini ajratish mumkin: motor (umumiy harakat xulq - atvori shakllanishida tananing chap va oʻng qismi qoʻl, oyoq va yuzning notekis ishtiroki). Sensor (juft sezgi organlarining funksional notekisligi va psixik nutqning tashkil topishi va boshqa oliy psixik jarayonlar).
Taxminan 70 % chapaqay bolalarning nutq markazlari chap miya yarim sharlarida, 30 % da esa oʻng miya yarim sharlarida joylashgandir.
Qoʻl – odam harakat faolligining yarim funksional aʼzosidir. Shuning uchun ham qoʻlning imo-ishora aʼzosi sifatida rivojlanishi chap qoʻlning nutq markazini tashkil topishida yetakchiligidan dalolat beradi. Qoʻl asimmetriyasi tushunchasi koʻp boʻlib, ulardan keng tarqalganlari: oʻng qoʻllik, chapaqaylik va ambidekstriya (ikki qoʻllik). Chapaqaylikni namoyon boʻlishi asosidagi omillarni koʻrsatar ekanlar, olimlar patologik, irsiy, va majburiy chapaqaylikni ajratadilar. Biroq koʻpchilik olimlar chapaqaylikni “tabiiy” irsiy ekanligini taʼkidlaydilar.
Ikkala miya yarim sharlari ham soʻzlarni, obrazlarni idrok qilishga va qayta ishlashga qodir, biroq bu jarayon ularda turlicha kechadi.
Chap miya yarim shari. Verbal, mantiqiy, “fikriy” (mushohada). Miyadan kelayotgan axborotlarni ketma-ket, tahliliy ravishda qayta ishlaydi. Vazifalarni yechishda unga induksiya tamoyiliga muvofiq tahliliy yondashuv xos (xususiydan umumiyga).
Oʻng miya yarim shari. Noverbal, obrazli, koʻruv. Signallarni bir vaqtda va butun holda qayta ishlaydi. Obyektlarni bir nechta fikriy tekislikda koʻrish imkonini beradi. Unga deduksiya tamoyiliga muvofiq sintez xosdir (umumiydan xususiyga). Qoidaga muvofiq, oʻng qoʻli yetakchilik qiluvchilarda verbal maʼlumotlarni qayta ishlashga ixtisoslashgan chap miya yarim sharlari ustunlik qiladi. Ularning 95 % da nutq markazi chap miya yarim sharlarida joylashgan.
Chapaqaylarning miya funksiyasi lateralizatsiyasining oʻziga xosligi ularning bilish jarayonlariga taʼsir qiladi, ularga quyidagilar taalluqli: maʼlumotlarni tahlil qilish usuli, materialni qismlarga boʻlib ishlash; noverbal stimullarga nisbatan verballarini yaxshiroq anglash; koʻruv- fazoviy topshiriqlarni bajarish imkoniyatining pastligi (Bezrukix M.M., Knyazeva M.G., 1994; Mikadze Yu.V., Korsakova N.K., 1994).
Yaqin kunlargacha chapaqay bolalarni oʻng qoʻlda yozishga oʻrgatish majburiy ravishda amalga oshirilgan. Biroq, hozirgi kunda ham bunday holatlar uchramoqda. Ayniqsa ota-onalarning chapaqay farzandlarini taʼlim jarayonida oʻng qoʻlini ishlatishga majbur qilishlari va oʻqituvchilarni ham bunga undashlari bolalarning psixik salomatligida jiddiy muammolarni keltirib chiqarmoqda. Koʻplab maʼlumotlarga koʻra, nevrotik holatlar va nevrozlar oʻng qoʻl ustunlik qiluvchi bolalarga nisbatan chapaqaylarda koʻproq uchramoqda. Chunki, chapaqay bolalarni majburlab (turli xil jazo choralarini qoʻllash orqali) oʻng qoʻlga oʻrgatish nevroz rivojlanishining sababidir. Oʻng qoʻlga qayta oʻrgatish lateralizatsiyaning tabiiy paydo boʻlgan individual yoʻnalishini sinishiga olib keladi, bu esa kuchli stressogen omil boʻlib chiqadi.
Shunday qilib, chapaqay bolalarni oʻng qoʻlga oʻtkazish umuman yoʻl qoʻyib boʻlmaydigan holatdir.
Chapaqay bolalarning faoliyatida bilish jarayonlari sohasida quyidagilar namoyon boʻlishi mumkin:
Koʻrsatib oʻtilgan oʻziga xosliklar bevosita oʻquv malakalarini egallashdagi samaradorlikka taʼsir qiladi. Chapaqay bolalarning yana bir oʻziga xosliklari, bu ularning emotsional taʼsirchanligi, xavotirchanligi, arazchiligi, asabiyligi, shuningdek, ishchanlik qobiliyatining pastligi va tez charchashdir. Bu nafaqat miya yarim sharlari assimetriyasi oqibati, balki ularni oʻng qoʻlga oʻtishga majburlash natijasi hamdir. Bundan tashqari, 20 % chapaqay bolalar anamnezida homiladorlik va tugʻruqda qiyinchiliklar qayd etiladi (baʼzi maʼlumotlarga koʻra tugʻruqdagi jarohat chapaqaylik sabablaridan biri boʻlishi mumkin, chunki, jarohatlangan chap miya yarim sharlarining funksiyasini bajarishni oʻng miya yarim sharlari oʻz zimmasiga oladi).
Chapaqay bolalarning emotsional taʼsirchanligi maktabga moslashishni qiyinlashtiruvchi omildir. Uni maktab hayotiga kirishi boshqalarga nisbatan sekinroq va ogʻriqliroq kechadi. Shuning uchun ham chapaqay bolalar doimo oʻqituvchi, psixolog va ota-onalarning alohida eʼtiborida boʻlishi kerak.
Shunday qilib, chapaqay bolalar maktabda koʻpgina muammolarga duch kelishlari mumkin. Ayniqsa, maktabgacha boʻlgan davrda va kichik maktab yoshida ularning toʻlaqonli psixix taraqqiyotiga yetarlicha zaruriy eʼtibor qaratilmasa, oʻquv faoliyatini egallashda jiddiy muammolarga olib keladi.