O‘qituvchi-logopedlar uchun navbatdagi o‘quv-seminar

2026-yil 22-yanvar kuni markaz tomonidan tasdiqlangan grafik-reja asosida umumta’lim maktablari qoshida tashkil etilgan logopediya shoxobchalarida faoliyat yuritayotgan o‘qituvchi-logopedlar uchun navbatdagi o‘quv-seminar tashkil etildi.

Mazkur o‘quv-seminar ko‘p tilli ta’lim muhitida logopedik xizmatni yanada takomillashtirish, turli tillarda ta’lim olayotgan o‘quvchilar bilan ishlashda fonetik va psixolingvistik yondashuvlarni chuqurlashtirish hamda o‘qituvchi-logopedlarning nazariy va amaliy bilimlarini boyitishga qaratildi.

O‘quv-seminar davomida quyidagi mutaxassislar tomonidan dolzarb va ilmiy-amaliy ahamiyatga ega ma’ruzalar tinglandi:

• Toshkent viloyati 33-umumta’lim maktabining qozoq tili va adabiyoti fani o‘qituvchisi S. Abdukalikova tomonidan
  “Qozoq tilidagi tovush va harflar haqida ma’lumot” mavzusida ma’ruza taqdim etildi.
  Ma’ruzada qozoq tilining fonetik xususiyatlari, tovush-harf tizimi, ayrim tovushlarning talaffuzdagi o‘ziga xos jihatlari hamda ushbu til muhitida ta’lim olayotgan bolalar bilan ishlashda logopedlar e’tibor berishi zarur bo‘lgan jihatlar atroflicha yoritildi.
• “Renessans ta’lim universiteti” professori Sh. Sultonova tomonidan
  “Neyrolingvistika (nutq psixologiyasi)” mavzusida ilmiy ma’ruza o‘qildi.
  Unda nutqning shakllanishida miya faoliyatining o‘rni, nutq va psixologik jarayonlar o‘rtasidagi o‘zaro bog‘liqlik, shuningdek, neyrolingvistik yondashuvlarning logopedik amaliyotdagi ahamiyati tahlil qilindi.

Seminar jarayoni va muhokamalar

Noan’anaviy tarzda tashkil etilgan o‘quv-seminar davomida nazariy bilimlar amaliy misollar va real holatlar bilan boyitildi. Seminarning yakuniy qismida tinglovchilar tomonidan berilgan savollarga atroflicha va asosli javoblar berilib, logopedik faoliyatda uchraydigan muammolar yuzasidan metodik tavsiyalar taqdim etildi.

Ishtirokchilar

Mazkur o‘quv-seminarda respublikaning turli hududlaridagi umumta’lim maktablarida faoliyat yuritayotgan 700 nafarga yaqin o‘qituvchi-logopedlar ishtirok etdi. Keng qamrovli ishtirok seminar mavzularining dolzarbligini va logopedik xizmatga bo‘lgan ehtiyoj yuqoriligini ko‘rsatdi.

Seminar ahamiyati

Ushbu o‘quv-seminar:

• o‘qituvchi-logopedlarning kasbiy salohiyatini oshirish;
• qozoq tiliga xos tovush-harf tizimini chuqurroq o‘rganish;
• nutq psixologiyasi va neyrolingvistika bo‘yicha bilimlarni kengaytirish;
• ko‘p tilli ta’lim sharoitida logopedik ishlar samaradorligini oshirish

yo‘lida muhim ahamiyat kasb etdi.