Bugun 47-umumta’lim maktabida maxsus pedagoglar uchun “Inklyuziv ta’limni samarali tashkil etish” mavzusida ilmiy-amaliy seminar o‘tkazildi. Mazkur tadbir inklyuziv ta’lim sohasida ishlayotgan mutaxassislar uchun bilim almashish, tajribalarni muhokama qilish va maktablarda samarali ishlash bo‘yicha amaliy ko‘nikmalarni oshirish maqsadida tashkil etildi.

    Seminarda Samarqand viloyati MMTB boshqarmasi “Inklyuziv va uy ta’limini muvofiqlashtirish” bo‘yicha metodisti M.Abdiyeva, Oqdaryo tumani MMTB “Bolalarni ijtimoiy psixologik qo‘llab-quvvatlash” sho‘basi metodisti U.Narzullayev, 47-maktab direktori va direktor o‘rinbosarlari hamda maktabdagi inklyuziv ta’lim maxsus pedagoglari ishtirok etdilar. Tadbir ko‘tarinki ruhda o‘tdi, ishtirokchilar bir-biri bilan bilim va tajribalarini faol almashdilar, savol-javob va muhokamalar orqali seminar interaktiv tarzda kechdi.

     Seminar davomida ishtirokchilar 47-maktabda yaratilgan inklyuziv ta’lim shart-sharoitlari bilan yaqindan tanishdilar. Maxsus pedagoglar o‘quvchilarning individual imkoniyatlarini hisobga olgan holda darslarni tashkil etish, zamonaviy didaktik va texnik vositalardan foydalanish, shuningdek pedagogik kuzatuv va qo‘llab-quvvatlash tizimini qanday samarali ishlatish bo‘yicha maktab tajribasi bilan o‘rtoqlashdilar.

     Mazkur ilmiy-amaliy seminar nafaqat inklyuziv ta’limni samarali tashkil etish bo‘yicha nazariy bilimlarni mustahkamlashga, balki amaliy tajribalarni baham ko‘rish, pedagoglar o‘rtasida professional muloqotni rivojlantirishga ham xizmat qildi. Tadbir yakunida ishtirokchilar maktablarda yaratilgan sharoitlar va amaliyot tajribasidan kelib chiqqan holda, kelgusida o‘z faoliyatlarida qo‘llash uchun foydali tavsiyalar oldilar.

    Shunday qilib, seminar nafaqat inklyuziv ta’limni yanada rivojlantirishga, balki har bir o‘quvchiga sifatli ta’lim muhitini ta’minlash, maxsus pedagoglarning kasbiy kompetensiyasini oshirish va maktablararo tajriba almashishga katta hissa qo‘shdi.