Xalqaro bolalarni himoya qilish kuni butun dunyo bolalari uchun eng beg‘ubor va quvonchli bayram hisoblanadi. Albatta, bola bu dunyo, bu hayot mazmunining ajralmas qismidir. Bolalar o‘z tabassumlari orqali insonlar qalbida hayotga, yashashga bo‘lgan qiziqishni uyg‘otadilar. Ko‘zlarida ezgulik va mehr qalqib turgan bolajon musaffo osmonda erkin parvoz etayotgan qaldirg‘och misoli.

1-iyun ya’ni, yozning 1-kuni dunyoning deyarli barcha mamlakatlarida kelajagimiz egalari uchun turli konsertlar, ko‘rgazmalar, sayillar, sport musobaqalari va turli xil tadbirlar o‘tkaziladi. Istirohat bog‘lari esa bolalarning tabassumlari bilan go‘yoki mo‘jizalar dunyosiga aylanadi. Mamlakatimizda ham ushbu bayram har yili dillarda quvonch ila nishonlanadi.

Fargʻona viloyat, Fargʻona shahrida 1-iyun Xalqaro bolalarni himoya qilish kuni munosabati bilan tashkillashtirilgan bayram tadbiriga inklyuziv ta’limda tahsil olayotgan bolajonlar ham taklif qilindi hamda ularga sovg‘alar ulashildi. Bayram tadbiri kuy-qo‘shiqlar, raqslar, bolajonlar yod olgan she’rlari bilan ko‘tarinki ruhda o‘tkazildi. Tashkilotchilarga ota-onalar va oʻqituvchilar nomidan tashakkurlar izhor qilindi.